Бугун Муқимий номидаги Ўзбекистон  давлат мусиқали театрида Маданият вазирлиги вакиллари ва театр жамоаси иштирокида йиғилиш бўлиб ўтди. 

Йиғилишда Маданият вазирининг биринчи ўринбосари Баҳодир Аҳмедов иштирок этиб, театр санъати олдида турган долзарб масалалар ва уларнинг ечимлари, келгусида бажарилиши лозим бўлган вазифалар хусусида театр жамаоси билан фикр алмашди.

Йиғилишда ташкилий масала ҳам ўрин олган бўлиб, Муқимий номидаги Ўзбекистон  давлат мусиқали театрига бош режиссёр этиб Баҳодир Назаров тайинланганлиги расман эълон қилинди. 

"Меҳнат шуҳрати" ордени соҳиби, Халқаро Аҳмад Яссавий, Бобур мукофоти совриндори Баҳодир Назаров бугунги кунга қадар Муқимий театрида саҳналаштирувчи режиссёр вазифасида ишлаб келган. 

Йиғилиш сўнггида куни кеча қутлуғ ёшини нишонлаган устоз санъаткоримиз Ўзбекистон халқ артисти Меҳри Бекжонова Маданият вазирлиги ҳамда театр касаба уюшмаси томонидан ташаккурнома ва эсдалик совғалари топширилиб қўшалоқ байрам билан муборакбод этилди.