Yodingizda bo‘lsa, biroz muddat avval Yunus Rajabiy nomidagi O‘zbek milliy musiqa san’ati institutida abituriyentlar bilan uchrashib, suhbatlashgan, ularga talabalikka erishishlarini tilagan edik. Bugun ana shunday baxtga muyassar bo‘lgan yigit-qizlar bilan yuzma-yuz muloqot qildik. O‘zbek milliy san’ati, ta’bir joiz bo‘lsa, misli ummon, bu cheksizlik tubida esa dur-u javohirlar yashirin. Ushbu dargohda ta’lim olishni istagan har bir yosh sabr-toqat, qunt va astoydil harakat bilan ana shu boylikka erishishi mumkin. Muloqot davomida shu kabi masalalar, qolaversa, talabalik davri zavqi-yu mas’uliyati xususida fikr almashdik. Ta’lim olishni boshlaganlariga ko‘p bo‘lmagan bo‘lsa-da, birinchi bosqich talabalari ijrosidagi konsert dasturini ko‘rib, yana bir karra ishonch hosil qildikki, ular bu sohaga adashib kirib qolishmagan. Va, albatta, ustozlar sabog‘i ham behuda ketmaydi.

Ozodbek Nazarbekov, madaniyat vaziri